kahan ye taab ki chakh chakh ke ya gira ke piyun
mile bhara hua saghar to dagdaga ke piyun
hazar talkh ho pir-e-mughan ne jab di hai
khuda na-karda jo main munh bana bana ke piyun
maza hai bada-kashi ka vahin to ai saaqi
piyun jo ab to tire astan pe aa ke piyun
baghair jalva dikhae rahe na ye maashuq
jo saat parde ke andar use chhupa ke piyun
main vo nahin ki khud apne qadah ki khair manaun
piyun to bazm men das panch ko pila ke piyun
zamin pe jaam ko rakh de zara thahar saaqi
main tujh pe huun luun tasadduq to phir utha ke piyun
vo mai-kada hai na saaqi hai kuchh na puchho ‘shad’
main kis ke ghar men piyun kis ke ghar se la ke piyun