Wafa Naqvi
kahin andhere kahin raushni se Darte hue
tamam-umr guzari hai ham ne marte hue
uḌa ke le to ga.i shaḳh se sabhi patte
hava ne dukh bhi na puchha mira guzarte hue
kahin ye ḳhvab si tasvir bol uTThi to
ḳhayal aaya musavvir ko rang bharte hue
use to bojh uThana tha apni hasti ka
vo muskura na saka aaj bhi sanvarte hue
ye zindagi ka bayaban agar ijazat de
zara si dhuup uTha luun yahan Thaharte hue
Leave a Reply