ik azaab hota hai roz ji ka khona bhi
ro ke muskurana bhi muskura ke rona bhi
raunaqen thi shahron men barkaten mohallon men
ab kahan mayassar hai ghar men ghar ka hona bhi
dil ke khel men har dam ehtiyat lazim hai
TuT-phuT jaata hai varna ye khilauna bhi
didani hai sahil par ye ghurub ka manzar
bah raha hai paani men asman ka sona bhi
raat hi ke daman men chand bhi hain taare bhi
raat hi ki qismat hai be-charagh hona bhi
vaqt aa paḌa aisa vaqt hi nahin milta
chhuT gaya hai barson se apna rona-dhona bhi
Leave a Reply