agle panch dinon tak jiina chahta huun
ro lunga par pahle hansna chahta huun
meri ankhon ke ab paanv kanpte hain
us ko main ji bhar ke takna chahta huun
main sahra huun kuchh badlao lazmi hai
ab main dariya ban kar bahna chahta huun
duniya vaalo aḳhir-kar turabi huun
main hathon par suraj dharna chahta huun
us ke har andaz ko sansen de kar main
us ke har andaz pe marna chahta huun
bahri nahin hai nok sinan ki sun legi
sar huun aur tilavat karna chahta huun
jo tere pahlu par hai us gagar se
izn mile to paani piina chahta huun
tera lams bhi dusra naam hai agni ka
chhu le mujh ko ab main jalna chahta huun
Leave a Reply