kal gae the tum jise bimar-e-hijran chhod kar
chal basa vo aaj sab hasti ka saman chhod kar
tifl-e-ashk aisa gira daman-e-mizhgan chhod kar
phir na uttha kucha-e-chak-e-gareban chhod kar
kyunki nikle tera us ka dil men paikan chhod kar
jaae baize ko kahan ye murgh-e-parran chhod kar
jis ne ho lazzat uthai zakhm tegh-e-ishq ki
kab vo marham-dan ko dhunde namak-dan chhod kar
said-e-dil ko kyunki chhode jab ki dikhla de na tu
machhliyan dast-e-hinai men miri jaan chhod kar
sard-mehri se kisi ki aage hi ji sard hai
yaan se hat ja dhuup ai abr-e-khiraman chhod kar
dekhiye kya ho ki hai ab jaan ke pichhe padi
dil ko ai kafir tiri zulf-e-pareshan chhod kar
ai dil us ke tiir ke hamrah siine se nikal
varna pachhtaega tu ye saath nadan chhod kar
kyuun na ram kar jaaen aahu aise vahshi se tire
sher bhagen jis ke nalon se nistan chhod kar
surkhi-e-pan dekh le zahid jo dandan par tire
uth khada ho haath se tasbih-e-marjan chhod kar
pesh-khema le ke nikla gard-bad-e-dur-rau
hai jo sargarm-e-safar tan ko miri jaan chhod kar
gar khuda deve qanaat mah-e-do-hafta ki tarah
daude saari ko kabhi aadhi na insan chhod kar
saghar-e-dil bechta aaya huun kho mat haath se
cukta hai kyuun ye jins-e-dast-gardan chhod kar
kaam ye tera hi tha rahmat ho ai abr-e-karam
varna jaae dagh-e-isyan mera daman chhod kar
padh ghazal ai ‘zauq’ koi garm si ab to na ja
janib-e-mazmun tarz-e-tufta-janan chhod kar