kin uljhanon men chhoḌ ga.i justuju mujhe
main aarzu ko DhunDhta huun aarzu mujhe
ummid ne bhi haath se daman chhuḌa liya
kya haal ho jo aise men mil jaa.e tu mujhe
maqsud-e-dil kuchh aur hai zauq-e-nazar kuchh aur
kis kashmakash men Daal ga.i aarzu mujhe
qurban be-ḳhudi ke kiya sab se be-niyaz
apni talash hai na tiri justuju mujhe
larzan thi jis ḳhayal se duniya-e-arzu
aalam vo aa raha hai nazar hu-ba-hu mujhe
har ik nafas hai saz-e-mohabbat bana hua
baḳhshi hai soz-e-ishq ne vo aabru mujhe
ik markaz-e-jamal hai meri nigah-e-shauq
pahuncha diya hai kis ne tire ru-ba-ru mujhe
shayad ‘munir’ ishq ki takmil ho ga.i
bar-e-garan hai aaj har ik aarzu mujhe
Leave a Reply