Kausar Niyazi
girte hue jab main ne tira naam liya hai
manzil ne vahin baḌh ke mujhe thaam liya hai
mai-ḳhvar to hai mohtasib-e-shahr ziyada
rindon ne yunhi muft men ilzam liya hai
vo mil na sake yaad to hai un ki salamat
is yaad se bhi ham ne bahut kaam liya hai
har marhala-e-gham men mili is se tasalli
har moḌ pe ghabra ke tira naam liya hai
tujh sa koi rahbar nahin ai duri-e-manzil
ehsan tira ham ne bahr-gam liya hai
ai shaiḳh dil-e-saf yunhi to nahin milta
ham ne asar-e-ru-e-dil-aram liya hai
sajdon men vo pahli se halavat nahin ‘kausar’
jab se asar-e-gardish-e-ayyam liya hai
Leave a Reply