Poet
zikr-e-bahar bhi raha zikr-e-ḳhizan ke saath
teri bhi dastan hai miri dastan ke saath
un ka bhi kuchh ḳhayal rahe ahl-e-karvan
jo aa rahe hain gard-e-rah-e-karvan ke saath
us vaqt rang la.ega afsana-e-vafa
dil ka lahu jab aa.ega ashk-e-ravan ke saath
har chiiz ajnabi si hai har shaḳhs ghair hai
duniya badal ga.i nigah-e-mehrban ke saath
‘sharib’ ye janta huun ki duniya hai bevafa
chalna paḌega phir bhi isi karvan ke saath
Leave a Reply