Kisi Ki Jit Ka Sadma Kisi Ki Mat Ka Bojh

Poet

kisi ki jiit ka sadma kisi ki maat ka bojh

kahan tak aur uTha.en ta.alluqat ka bojh

ana ka bojh bhi aaya usi ke hisse men

bahut hai jis ke uThane ko apni zaat ka bojh

jhaTak diya hai kabhi sar se bar-e-hasti bhi

uTha liya hai kabhi sar pe ka.enat ka bojh

abhi se aaj ke din ka hisab kya ma.ani

abhi to zehn pe baaqi hai kal ki raat ka bojh

yahi na ho main kisi din kuchal ke rah ja.un

ubharta hai bahut zaat ko sifat ka bojh

paḌa tha saaya bas ik baar dast-e-shafqat ka

so ab ye sar hai mira aur kisi ke haath ka bojh

abhi do chaar na kar hijr ki aziyyat se

abhi to main ne uThaya hai tere saath ka bojh