nazar ko bhaa.e jo manzar pahan ke nikla hai
dhanak vo apne badan par pahan ke nikla hai
main aa.ina huun magar pattharon se kah dena
ik aa.ina hai jo patthar pahan ke nikla hai
vo apni aankh ki uryaniyat chhupane ko
haya ki aankh pe chadar pahan ke nikla hai
chhupa ke rakhta to tu bhi havas se bach jaata
magar tu husn ka zevar pahan ke nikla hai
zamana us ko kabhi bhi Dara nahin sakta
ḳhuda ka ḳhauf jo dil par pahan ke nikla hai
kulah sar pe nahin munsif-e-zamana ke
vo apne sar pe mira sar pahan ke nikla hai
Leave a Reply