Nazar Ko Bhae Jo Manzar Pahan Ke Nikla Hai

nazar ko bhaa.e jo manzar pahan ke niklā hai

dhanak vo apne badan par pahan ke niklā hai

maiñ aa.ina huuñ magar pattharoñ se kah denā

ik aa.ina hai jo patthar pahan ke niklā hai

vo apnī aañkh kī uryāniyat chhupāne ko

hayā kī aañkh pe chādar pahan ke niklā hai

chhupā ke rakhtā to tū bhī havas se bach jaatā

magar tū husn kā zevar pahan ke niklā hai

zamāna us ko kabhī bhī Darā nahīñ saktā

ḳhudā kā ḳhauf jo dil par pahan ke niklā hai

kulāh sar pe nahīñ munsif-e-zamāna ke

vo apne sar pe mirā sar pahan ke niklā hai

Leave a Comment