naav ḳhasta bhi na thi mauj men dariya bhi na tha
paar utarta tha magar tujh pe bharosa bhi na tha
zindagi haath na de paa.i mire hathon men
saath jaana bhi na tha haath chhuḌana bhi na tha
jin pe ik umr chala tha unhi raston pe kahin
vapas aaya to mira naqsh-e-kaf-e-pa bhi na tha
gharq-e-duniya ke liye dast-e-dua kya uThte
koi is ghar men dua mangne vaala bhi na tha
har koi mera ḳharidar nazar aaya mujhe
chaak par main ne abhi ḳhud ko ubhara bhi na tha
phailta jaata hai har saans rag o pai men ‘najib’
ek sahra jo abhi raah men aaya bhi na tha
Leave a Reply