Ayush Charag
zindagi men ḳhushi nahin aa.i
ye saba is gali nahin aa.i
aap ko nazm kar nahin paaya
haan mujhe sha.iri nahin aa.i
baat kahne ka Dhang soch liya
baat kahni kabhi nahin aa.i
bus ko roke hue the dost mire
aur vo bavri nahin aa.i
log sadiyon ke dard kaaT ga.e
par shab-e-aḳhiri nahin aa.i
hosh men ghumte ho saḌkon par
tum ko avargi nahin aa.i
ek marhum ki tarah vapas
umr guzri hui nahin aa.i
choT avaz se lagi aur phir
hosh men ḳhamushi nahin aa.i
Leave a Reply