mira mushkil-kusha hai aur main huun
usi ka aasra hai aur main huun
mira dast-e-dua hai aur main huun
sada-e-be-sada hai aur main huun
dil-e-gham-ashna hai aur main huun
jafa-e-na-rava hai aur main huun
sitam sahne ki aadat paḌ ga.i hai
vafaon ka sila hai aur main huun
main kaise jhuuT bolun sochta huun
muqabil aa.ina hai aur main huun
jise tariḳh kahta hai zamana
vo mera tazkira hai aur main huun
vahin meri baqa ka rasta hai
jahan mera ḳhuda hai aur main huun
chale aao yahan koi nahin hai
mire dil ki sada hai aur main huun
tumhen chhune ki jin ko hai tamanna
vo ik pagal hava hai aur men huun
‘suhaib’ aao ibadat ki ghaḌi hai
dar-e-mai-ḳhana va hai aur main huun
Leave a Reply