Dil-E-Fasurda Pe Sau Bar Tazgi Aai

Arsh Malsiyani

dil-e-fasurda pe sau baar tazgi aa.i

magar vo yaad ki ja kar na phir kabhi aa.i

chaman men kaun hai pursan-e-hal shabnam ka

gharib ro.e to ghunchon ko bhi hansi aa.i

naved-e-aish se bhi lutf-e-aish mil na saka

libas-e-gham hi men aa.i agar ḳhushi aa.i

kisi tarah bhi zamane ko bas men kar na sake

na dosti na hamen raas dushmani aa.i

ajab na tha ki gham-e-dil shikast kha jaata

hazar shukr tire lutf men kami aa.i

zamana hansta hai mujh par hazar baar hanse

tumhari aankh men lekin ye kyuun nami aa.i

diye jala.e umidon ne dil ke gird bahut

kisi taraf se na us ghar men raushni aa.i

hazar diid pe pabandiyan thiin parde the

nigah-e-shauq magar un ko dekh hi aa.i