Dr Azam
buland fikr ki har sher se ayaan ho ramaq
mire qalam se ada ho kabhi ghazal ka haq
udaas udaas hain insan har ek chehra faq
ye shahr shahr hai ya dasht hai ye laq-o-daq
main dil ki baat kahun yuun ki dil talak pahunche
na hon kina.e hi mub.ham na isti.are adaq
chalo sameT ke office ko apne ghar ki taraf
ufuq ke paar vo dekho utar rahi hai shafaq
zara sa ilm-o-hunar pa ga.e to kuchh kam-zarf
samajh rahe hain sabhi ko hi ahqar-o-ahmaq
phir ehtijaj ke raste pe kyuun chalenge ham
hamen jo milta rahe aap se hamara haq
ta.alluqat men qaa.em rakhen bharose ko
ki shak hamesha hi karta raha hai rishte shaq
kisi kitab men milta nahin hai zikr ‘azam’
hamen sikha.e hain is zindagi ne aise sabaq
Leave a Reply