Aur Gulon Ka Kaam Nahin Hota Koi

aur guloñ kā kaam nahīñ hotā koī

ḳhushbū kā in.aam nahīñ hotā koī

thak gayā ek kahānī sunte sunte maiñ

kyā is kā anjām nahīñ hotā koī

sahrāoñ meñ ḳhaak uḌātā phirtā huuñ

is ke alāva kaam nahīñ hotā koī

dekho to kyā ḳhush rahte haiñ dil vaale

pūchho to ārām nahīñ hotā koī

chaTTāneñ bas saḳht huā kartī haiñ ‘zeb’

chaTTānoñ kā naam nahīñ hotā koī

Leave a Comment