Khub Roka Shikayaton Se Mujhe

khuub roka shikayaton se mujhe

tu ne maara inayaton se mujhe

vajib-ul-qatl us ne thahraya

ayaton se rivayaton se mujhe

kahte kya kya hain dekh to aghyar

yaar teri himayaton se mujhe

kya ghazab hai ki dost tu samjhe

dushmanon ki riayaton se mujhe

dam-e-girya kami na kar ai chashm

shauq kam hai kifayaton se mujhe

kami-e-girya ne jala maara

hua nuqsan kifayaton se mujhe

le gai ishq ki hidayat ‘zauq’

un kane sab nihayaton se mujhe

Leave a Comment