Arshi Bhopali
raqs-e-ashufta-sari ki koi tadbir sahi
lo mire paanv men ik aur bhi zanjir sahi
imtihan is dil-e-pur-shauq ka karte rahiye
aur is jurm-e-vafa par koi tazir sahi
tan-o-dushnam se divane na baaz a.enge
koi ilzam sahi tohmat-e-taqsir sahi
ham to avara-e-sahra hain hamen kya matlab
un ki mahfil men junun ki koi tauqir sahi
har koi yusuf-e-kan.an to nahin ban sakta
mera farda hi mire ḳhvab ki tabir sahi
qafile kitne hi manzil se bhaTak jaate hain
ham musafir na sahi ham koi rah-gir sahi
nara-e-zulf-e-sanam shart-e-junun kya ma.ani
dard rusva hi sahi ishq jahangir sahi
Leave a Reply