har ek aankh ko kuchh TuuTe ḳhvab de ke gaya
vo zindagi ko ye kaisa azaab de ke gaya
na de saka mujhe vus.at samundaron ki magar
samundaron ka mujhe iztirab de ke gaya
vo kis liye mira dushman tha jaane kaun tha vo
jo aankh aankh musalsal sarab de ke gaya
ḳhala ke naam ata kar ke chhanv ki miras
mujhe vo jalta hua aftab de ke gaya
vo peḌ unchi chaTanon pe ab bhi tanha hain
unhi ko saari mata-e-sahab de ke gaya
har ek lafz men rakh kar sarab ma.ani ka
har ek haath men vo ik kitab de ke gaya
main kul huun aur tu juz men bhi kul hai ai ‘manzur’
bichhaḌte vaqt mujhe ye ḳhitab de ke gaya
Leave a Reply