Poet
chalte chalte chale aa.e hain pareshani men
ḳhvab to dab chuke is kuche ki virani men
toḌ kar paanv paḌe hain ki vo himmat na rahi
uḌte badal the kabhi chak-girebani men
hijr ki raah men chalte rahe girte-paḌte
saath kuchh bhi na liya be-sar-o-samani men
us shahanshah ko main kaise shahanshah kahun
sarhaden TuTti hon jis ki jahanbani men
pahunche manzil pe to hasil tha faqat yas-o-hiras
umr ik biit ga.i silsila jumbani men
us ke jaane pe ye ehsas hua hai ‘shahid’
vo jazira tha mira dukh se bhare paani men
Leave a Reply