Ishrat Zafar
mujhe kuchh aur bhi tapta sulagta chhoḌ jaata hai
sahab aksar mere siine pe dariya chhoḌ jaata hai
vahi ik ra.egan lamha ki main jis ka shanavar huun
nigahon men miri shahr-e-tamasha chhoḌ jaata hai
guzarta hai jis a.ine se bhi mausam shararon ka
chaman ko saath le jaata hai sahra chhoḌ jaata hai
navah-e-dasht men ḳhush-manzari taqsim karta hai
vo badal jo miri basti ko pyasa chhoḌ jaata hai
mire kamre ki divaron men aise aa.ine bhi hain
ki jin ke paas har shaḳhs apna chehra chhoḌ jaata hai
vo mere raaz mujh men chahta hai munkashif karna
mujhe mere ghane saa.e men tanha chhoḌ jaata hai
ajab sho.ala hai ‘ishrat’ us ka lams-e-be-nihayat bhi
mire charon taraf jo ik ujala chhoḌ jaata hai
Leave a Reply