Ye Ghalat Hai Ai Dil-E-Bad-Guman Ki Wahan Kisi Ka Guzar Nahin

Aziz Lakhnavi

ye ghalat hai ai dil-e-bad-guman ki vahan kisi ka guzar nahin

faqat is liye ye hijab hai ki kisi ko tab-e-nazar nahin

kaho kuchh haqiqat-e-mushtahar ki mujhe kahin ki ḳhabar nahin

ye manazir-e-do-jahan hain kya jo fareb-e-zauq-e-nazar nahin

kisi aah men nahin soz jab kisi naale men jab asar nahin

ye kamal-e-sozish-e-dil nahin ye farogh-e-dagh-e-jigar nahin

chamak uTh rahi hai jo pai-ba-pai ye tajalliyon ka ḳhazana hai

ye hujum-e-barq-e-tapan nahin ye mata-e-dard-e-jigar nahin

ye hai ehtimam-e-hijab kyuun ye hai band-o-bast-e-naqab kyuun

tumhen aankh bhar ke main dekh luun vo nazar nahin vo jigar nahin

vo rahin-e-lazzat-e-gham huun main na mili azal men jise tarab

main hi us karam ka tha muntazir main hi mustahiq tha magar nahin

kabhi vaqt-e-naz-o-niyaz hai kabhi mahv-e-zulf-e-ayaz hai

magar us pe bhi dil-e-ghaznavi karam-ashna-e-nazar nahin

ye tayyunat-e-nizam the faqat ek parda-e-masiva

ḳhabar us ki jab se hui mujhe koi is jahan ki ḳhabar nahin

tujhe kar-gah-e-fana bata inhi hastiyon pe ghurur hai

jo sharik-e-sud-o-ziyan nahin jo rahin-e-naf-o-zarar nahin

chamak ai charagh-e-zamir ab ki tulua mehr-e-kamal ho

vo lahad huun tira-o-tar main ki jahan bayaz-e-sahar nahin

na vo soz hai na vo saaz hai na vo dil ḳhazana-e-raz hai

vo sharar huun jis men dhuan nahin vo hajar huun jis men sharar nahin

nazar us ki hai miri samt abhi mira daman-e-goharin na dekh

abhi ḳhun-e-dil hai ruka hua abhi ansuon se ye tar nahin

chamak ai tajalli-e-dil-ruba nikal ai ḳhulasa-e-dua

ki nazara-e-do-jahan faqat ye ma.al-e-zauq-e-nazar nahin

ye jubba-sa.i-e-be-mahal mujhe shab ko de rahi thi ḳhabar

na miTa de zulmat-e-dahr jo vo nishan-e-sajda-e-dar nahin

ye taghayyurat-e-jahan nahin asar-e-talavvun-e-tab.a hai

tiri ik nazar ka karishma ye falak ki gardish-e-sar nahin

kaho sham.a se ki ye naql kya koi apna qissa-e-gham kahe

kare ab fasane ko muḳhtasar ki mujhe umid-e-sahar nahin

hai talash apni faqat mujhe main milun to hongi shikayaten

mujhe ab kisi se gila nahin mujhe ab kisi ki ḳhabar nahin

yahi manzilen hain vo manzilen ki jahannam un se panah le

dil-e-na-shanas-e-rah-e-vafa mujhe koi ḳhauf-o-ḳhatar nahin

miri ghaflaton ka gila na kar yahi nazm-e-kaun-o-fasad hai

ḳhabar is tilism-e-numud ki mujhe ho chuki hai magar nahin

sabaq us se le ki ḳhabar mile tujhe aane vaale zamane ki

hai taghayyurat ka aa.ina ye shikasta kasa-e-sar nahin

ye hain daar teri nigah ke kisi na-tavan se rukenge kya

dil-e-dagh dagh-e-‘aziz’ hai sitam-azma ye sipar nahin