zaKHm Par zaKHm Muhibban-E-Sitam Dete Gae

zaḳhm par zaḳhm muhibban-e-sitam dete ga.e

tah-ba-tah jam ga.e gham phir bhi vo gham dete ga.e

ham unhen kashf ki surat nazar aa.e har vaqt

vo magar ham ko faqat ḳhvab-e-adam dete ga.e

gul the maqsud hamara tha samar ho jaana

toḌ kar shaḳh se kyon ranj-o-alam dete ga.e

ahl-e-batil ki ye sazish thi ki mafluj ho fikr

naam le le ke haqiqat ka bharam dete ga.e

ahal-e-quvvat ke isharon pe qalam chalta gaya

vo evaz men use ik ḳhaas raqam dete ga.e

lagta hai ruk si ga.i valiyon ki afza.ish-e-nasl

aur shaitanon ko shaitan janam dete ga.e

Thahre mahbub unhen Thagne ka haq tha ‘javed’

hukm dete rahe jis chiiz ka ham dete ga.e