vo aa.ega dil se dua to karo
namaz-e-mohabbat ada to karo
milega koi ban ke unvan bhi
kahani ki tum ibtida to karo
samajhne lagoge nazar ki zaban
mohabbat se dil ashna to karo
tumhen maar Dalengi tanha.iyan
hamen apne dil se juda to karo
tumhare karam se hai ye zindagi
main bujh ja.unga tum hava to karo
hazaron manazir nigahon men hain
rukoge kahan faisla to karo
pukare tumhen kucha-e-arzu
kabhi ‘naqsh’ dil ka kaha to karo
Leave a Reply