Raushan Har Ek Samt Charagh-E-Nazar to Ho

Shahid Kaleem

raushan har ek samt charagh-e-nazar to ho

hukm-e-safar se pahle hisab-e-safar to ho

is shahr ka sukut kabhi TuTta nahin

chiḳhun to meri chiḳh men koi asar to ho

main to siyah raat ke zindan men huun asiir

saaya mira kahan hai mujhe kuchh ḳhabar to ho

paani ka ye bahao nadi ki shanaḳht hai

ab mere barf barf badan men sharar to ho

fasl-e-bahar se main karun iltija-e-gul

sahra-e-be-kanar men koi shajar to ho

charon taraf dhuan hi dhuan hai fazaon men

manzar koi khule kabhi nur-e-sahar to ho

andhi chale aur us men jala den koi charagh

‘shahid’ hamare haath men aisa hunar to ho