sab jal gaya jalte hue khvabon ke asar se
uthta hai dhuan dil se nigahon se jigar se
aaj us ke janaze men hai ik shahr saf-ara
kal mar gaya jo aadmi tanhai ke dar se
kab tak gae rishton se nibhata main taalluq
is bojh ko ai dost utaar aaya huun sar se
jo aina-khana miri hairat ka sabab hai
mumkin hai mire baad miri diid ko tarse
is ahd-e-khizan men kisi ummid ke manind
patthar se nikal aauun magar abr to barse
ruthe hue suraj ko manane ki lagan men
ham log sar-e-sham nikal padte hain ghar se
us shakhs ka ab phir se khada hona hai mushkil
is baar gira hai vo zamane ki nazar se
lagta hai ki is dil men koi qaid hai ‘ashfaq’
rone ki sada aati hai yadon ke khandar se
Leave a Reply