Prem Warbartani
aarti ham kya utaren husn-e-mala-mal ki
bujh ga.i har jot puuja ke sunahre thaal ki
tum to kya dastak nahin detin hava.en tak yahan
dil hai ya sunsan kuTiya hai kisi kangal ki
dekh ai gul-pairahan tere liye pardes se
kaun laaya hai havaon ki mo.attar palki
phir ugane do yahan ham ko lahu ke kuchh gulab
aap ne to shahrah-e-dil bahut pamal ki
tu muqaddas aankh hai ya.ani hasin suraj ki aankh
aur main gahri gupha vo bhi kisi patal ki
tum pilao apne honTon se agar ab-e-hayat
phenk denge ham surahi atishin sayyal ki
gunguna kar tairta hai jis men ḳhushbu ka badan
‘prem’ teri sha.iri vo jhiil hai sur-tal ki
Leave a Reply