Hum Bhi Badal Gae Teri Tarz-E-Ada Ke Sath Sath

Athar Nafees

ham bhi badal ga.e tiri tarz-e-ada ke saath saath

rang-e-hina ke saath saath shoḳhi-e-pa ke saath saath

nik.hat-e-zulf le uḌi misl-e-ḳhayal chal paḌi

chalta hai kaun dekhiye aaj hina ke saath saath

itni jafa-taraziyan itni sitam-shi.ariyan

tum bhi chale ho kuchh qadam ahl-e-vafa ke saath saath

vahshat-e-dard-e-hijr ne ham ko jaga jaga diya

niind kabhi jo aa ga.i ThanDi hua ke saath saath

hosh uḌa uḌa diye raah ke iztirab ne

nik.hat-e-gul chali to thi bad-e-saba ke saath saath