main alam-e-imkan men jise DhunDh raha huun
vo puchh raha hai ki kise DhunDh raha huun
maazi ke bayaban men jo gum ho gaya mujh se
main haal ke jangal men use DhunDh raha huun
go pesh-e-nazar ek tamasha hai va-lekin
ai vaj.h-e-tamasha main tujhe DhunDh raha huun
tu haath jo aata nahin is ka hai sabab kya
shayad main tujhe tujh se pare DhunDh raha huun
chhina tha jise sub.h-e-gurezan ki chamak ne
us lamhe ko ab shaam Dhale DhunDh raha huun
har ik se jo kahta hon kahin ‘arsh’ ko DhunDo
kyuun apne bahane main use DhunDh raha huun
Leave a Reply