ghar men daraḌ Dalte rishton ki ḳhair ho
is astin men aa base sanpon ki ḳhair ho
vo TuTne lagin to suhulat mujhe bhi hai
shab men qarar baḳhshte taron ki ḳhair ho
ye log har qadam pe girane lage mujhe
lekin sambhalti tiri banhon ki ḳhair ho
tu jo nahin to phuul to hain as-pas bhi
is habs men khile hue ghunchon ki ḳhair ho
ruk sa gaya nadi ka bahav baras se tha
us men dhule hue tire pairon ki ḳhair ho
jis samt huun ravan-davan manzil bhi hai vahin
raston men ja-ba-ja paḌe kanTon ki ḳhair ho
main kya kahun ki kitne zamane guzar ga.e
hisse men mere aa.en na ḳhushiyon ki ḳhair ho
mauj-e-fana ne dasht men la kar jhaTak diya
hairat se dekhti tiri ankhon ki ḳhair ho
ye iztirab-e-ishq se tohfa mila mujhe
munh ko chiḌa rahe tire lafzon ki ḳhair ho
baghon men sair karte hue jugnuon men tum
tum se ziya pakaḌte charaghon ki ḳhair ho
un ke sabab se hi hui main dar se be-aman
‘an.am’ tumhare haal pe hanston ki ḳhair ho
Leave a Reply