Poet
ye ishq ik imtihan to le main paas kar luun
hudud huun to hudud saari cross kar luun
bahut kaThin mas.alon ki tahlil bhi hai mumkin
agar main ik mas.ale ke TukḌe pachas kar luun
tamam qudrat khaḌi hai imkan ke nazariye par
qadam uThane se pahle sikke se toss kar luun
kisan kheton se ghar na ja paaya sochta tha
ikaTThi pahle main umr-bhar ki kapas kar luun
ye zindagi mumkinat ka ik hara shajar hai
koi to ummid bandh luun koi aas kar luun
shuja.aton ke lagenge sab vaqi.at jhuTe
main ḳhud ko gar mubtala-e-ḳhuaf-o-hiras kar luun
safar to kaT ja.ega magar kya safar kaTega
so apne hamrah chand phulon ki baas kar luun
main aankh men muntaqil karun raushni ko ‘zishan’
magar ye behtar hai dhuup ka in.ikas kar luun
Leave a Reply