rishta badan ka ḳhatm hua apni jaan se
milti hai shakl shahar ki mere makan se
ḳhvahish ko us ki jaise koi daḳhl hi na tha
yuun us ne mujh ko phenk diya asman se
kaisi lagi hai aag ki bujhti nahin kabhi
ik silsila hai kab se dhuen ka chaTTan se
munh se jo baat nikli vo pahunchi nagar nagar
lauTa na phir vo tiir jo nikla kaman se
patthar ke niche dafn hai har harf-e-guftani
ab sirf maslahat ka hai rishta zaban se
tairo lahu men apne to mumkin hai ḳhud ko paao
dhulta hai sirf jism hi ganga-nahan se
Leave a Reply