Habeeb Ahmad Siddiqui
kuchh bhi dushvar nahin azm-e-javan ke aage
ashiyan bante ga.e barq-e-tapan ke aage
zindagi naghma-e-dil-kash hai magar ai nadan
tu ne sikha hi nahin ah-o-fughan ke aage
qissa-e-bazm-e-tarab tazkira-e-mausam-e-gul
ḳhuub hain yuun to magar soḳhta-jan ke aage
ham hain aur fasl-e-ḳhizan fasl-e-ḳhizan hai aur ham
ham se kya puchhte ho fasl-e-ḳhizan ke aage
dastaras aql ki hai sarhad-e-idrak sahi
manzilen aur bhi hain vahm-o-guman ke aage
zahmat-e-yak-nigah-e-lutf kabhi to ai dost
ham ko kahna hai bahut lafz-o-bayan ke aage
yuun to dozaḳh men bhi hangame bapa hain lekin
phike phike se hain ashob-e-jahan ke aage
Leave a Reply