qafila utra sahra men aur pesh vahi manzar aa.e
raakh uḌi ḳhema-gahon ki ḳhuun men luThḌe sar aa.e
galiyon men ghamsan ka ran hai ma.arka dast-ba-dast hai yaan
jise bhi ḳhud par naaz bahut ho angan se bahar aa.e
ik aaseb sa lahrata hai basti ki shah-rahon par
shaam Dhale jo ghar se nikle lauT ke phir nahin ghar aa.e
dinon mahinon ankhen roiin na.i ruton ki ḳhvahish men
rut badli to sukhe patte dahlizon men dar aa.e
ek diya raushan rakhna divar pe chand sitaron sa
abr uThe barish barse ya havaon ka lashkar aa.e
varna kis ne paar kiya tha rasta bhari dopahron ka
kuchh ham se divane the jo tai ye masafat kar aa.e
Leave a Reply