Poet
pahna libas ne hai ik ik ang dekhna
jism-e-hasin pe pairahan-e-tang dekhna
naddi chaḌhi ki gaanv ki gori javan hui
paani men ghul ga.e hain ka.i rang dekhna
parbat ki shaam Dubta suraj shafaq ka rang
sona ugal rahi hai rag-e-sang dekhna
jaati ruton ki surat-e-arzang bhuul kar
aate samay ka paikar-e-sad-rang dekhna
aahaT suno havaon ki dahliz-e-sham par
chup ki fazaon men bhi hai ahang dekhna
dilchasp is qadar tire chehre ki hai kitab
bhula hua huun dahr ki farhang dekhna
basti men kaun aa gaya jangal ko chhoḌ kar
pichhe lage hue hain sag-o-sang dekhna
Leave a Reply