bam-o-dar TuuT ga.e bah gaya paani kitna
aur barbad karegi ye javani kitna
rang kumhla diya balon men piro di chandi
tuul khinchegi abhi aur kahani kitna
ye talatum ye ana abla-pa.i ye junun
ham bhi dekhenge ki hai josh-e-javani kitna
darmiyan aa gaya ib.ham ka ik koh garan
DhunDte rah ga.e ham dasht-e-ma.ani kitna
barf ki tarah jame jaate hain saare alfaz
kaam aa.egi yahan sehr-bayani kitna
Duub kar sanson men rag rag men sama kar dekho
mas.ala dil ka sulajhta hai zabani kitna
baḌhta ja.ega ye sailab-e-havadis ‘shahid’
rok pa.ega koi zor-e-ravani kitna
Leave a Reply