vaqt ki tez ravi dekh ke Dar jaate hain
log jiite hain kuchh is tarah ki mar jaate hain
zindagani tiri azmat ko baḌhane vaale
muskurate hue maqtal se guzar jaate hain
bazm yaran ho ki dasht-e-shab-e-tanha.i ho
zaḳhm bharne pe jab aate hain to bhar jaate hain
ye shab-o-roz bhi auraq-e-pareshan ki tarah
barha vaqt ki andhi men bikhar jaate hain
kitni yadon se ulajhti hai miri tanha.i
kitne tufan mire sar se guzar jaate hain
duur rah kar bhi kabhi shikva-e-duri na raha
aap hi aap hain jis samt jidhar jaate hain
apni palkon pe saja.e hue ashkon ke charagh
kuchh to kahiye ki ‘ra.is’ aap kidhar jaate hain
Leave a Reply