Baqi Ahmad Puri
dasht-o-dariya ke ye us paar kahan tak jaati
ghar ki divar thi divar kahan tak jaati
miT ga.i hasrat-e-didar bhi rafta rafta
hijr men hasrat-e-didar kahan tak jaati
thak ga.e honT tira naam bhi lete lete
ek hi lafz ki takrar kahan tak jaati
laaj rakhna thi masiha.i ki ham ko varna
dekhte lazzat-e-azar kahan tak jaati
rahbar us ko sarabon men liye phirte the
ḳhilqat-e-shahr thi bimar kahan tak jaati
har taraf husn ke bazar lage the ‘baqi’
har taraf chashm-e-ḳharidar kahan tak jaati
Leave a Reply