Zubair Rizvi
har qadam sail-e-havadis se bachaya hai mujhe
kabhi dil men kabhi ankhon men chhupaya hai mujhe
aur sab log to mai-ḳhane se ghar lauT ga.e
mehrban raat ne siine se lagaya hai mujhe
har hasin anjuman-e-shab mujhe dohrati hai
jaane kis mutrib-e-ashufta ne gaaya hai mujhe
sang-sazon ne tarasha hai mire paikar ko
tum ne kya soch ke patthar pe giraya hai mujhe
aane valon men koi apna shanasa hota
surat-e-farsh-e-dil-o-dida bichhaya hai mujhe
kachchi divaron ko paani ki lahar kaaT ga.i
pahli barish hi ne barsat ki Dhaya hai mujhe
main jiya ishq ki ik zinda alamat ban kar
dastan-goyon ne raton ko sunaya hai mujhe
Leave a Reply