ek se ek hai gharat-gar-e-iman yahan
ai mire dil tira allah nigahban yahan
chhoḌ kar ja.un tire shahr ki galiyan kaise
dil yahan ruuh yahan jism yahan jaan yahan
kis se puchhun ki vo be-mehr kahan rahta hai
dil-e-be-tab miri jaan na pahchan yahan
jaane is shahr ka meyar-e-sadaqat kya hai
but bhi hathon men liye phirte hain qur.an yahan
TuuT jaa.e to ise dil ka laqab milta hai
chaak ho jaa.e to hota hai gareban yahan
aur honge jinhen tufan Dubo deta hai
ham jo Duube to bahut a.enge tufan yahan
ab yahi log karenge na.i duniya ta.amir
tu ne dekha hai jinhen be-sar-o-saman yahan
‘saif’ kya ḳhuub zamane ki hava badli hai
taḳht-e-ta.us pe aa baiThe hain darban yahan
Leave a Reply