Mayank Awasthi
tab us ka zahr usi ke badan men bhar jaa.e
agar zaban na chala.e to saanp mar jaa.e
khaḌi hai dar pe ajal aur mujh men jaan nahin
kaho vo der se aa.i hai apne ghar jaa.e
koi charagh jahan raushni ka zikr kare
siyah raat ka chehra vahin utar jaa.e
vo barg-e-ḳhushk jise shaḳh ne lataḌ diya
hava ke saath na jaa.e to phir kidhar jaa.e
ye jo charagh havaon ki dhun pe raqsan hai
use batao abhi vaqt hai sudhar jaa.e
adab ki soch yahi hai tumhara tiir nahin
tumhara sher dil-o-jan men utar jaa.e
tire bayan men ḳhushbu hai raushni dil men
‘mayank’ sab ki tamanna hai tu bikhar jaa.e
Leave a Reply