Syed Nawab Haider Naqvi Rahi
husn-e-be-parva ne jab chaha huvaida ho gaya
aur jab chaha zamane-bhar se parda ho gaya
toḌne paḌte hain sab rishte pa.e irfan-e-fan
jo savad-e-shauq men aaya vo tanha ho gaya
thi ye ḳhush-fahmi ki hai payab dariya fikr ka
is men utre the ki paani sar se uncha ho gaya
pur-asar nikli karishma-sazi husn-e-talab
kal talak jo ghair tha vo aaj apna ho gaya
dard-e-tanha.i se sote-jagte kaaTi thi raat
sub.h ne marham rakha aisa gavara ho gaya
kya kahen us ko ba-juz sar-gashta-e-fahm-o-ḳhirad
jis ko divana kaha duniya ne daana ho gaya
nala-e-shab-gir tha be-kaif ‘rahi’ is qadar
us ke sannaTon se saara shahr suuna ho gaya
Leave a Reply