agar vo be-adab hai be-adab likh
kabhi jo likh nahin paaya vo ab likh
tamazat hirs ki had se badhi hai
samundar khud hua hai tishna-lab likh
ana meri zaban khulne na degi
mujhe tu jitna chahe be-talab likh
kamina saari duniya tere aage
magar apna bhi to nam-o-nasab likh
miri qindil-e-jan jalti hai shab bhar
zara apni bhi to rudad-e-shab likh
‘tapish’ tere liye meri dua hai
jo haq tu janta hai sab ka sab likh
Leave a Reply