Poet
shaghl mai chhoḌiye uTh aa.iye mai-ḳhanon se
sho.ale kuchh duur nahin aap ke aivanon se
dekhna rang-e-gulistan hi badal Dalenge
ab ke palTe jo ye divane bayabanon se
mutma.in aap na hon bhej ke zindan men hamen
inqilabat uTha karte hain zindanon se
vaqt ki baat qafas men bhi Thikana na raha
ho chala tha hamen jab uns nigahbanon se
saghar-e-zabt chhalakne ko hai ai ahd shikan
dil bahalta nahin TuuTe hue paimanon se
na mohabbat na muravvat na hamiyyat na ḳhulus
aaj insan nazar aate nahin insanon se
aag ye kis ne baharon men laga di ‘at.har’
uTh raha hai ye dhuan kaisa gulistanon se
Leave a Reply