koi achchha nahin hota hai bari chalon se
lab-e-bam aa ke khade ho na khule balon se
roz-o-shab kis liye rahta huun ilahi betab
na to goron se mohabbat na mujhe kalon se
josh-e-vahshat men jo jangal ki taraf ja nikla
tap chadhi sher-e-niyastan ko mire nalon se
koi kuchh ishq ka karta hai bayan koi kuchh
tang aaya huun main is qaziya ke dallalon se
beshtar subh-e-shab-e-vasl se ham guzrenge
zor-e-adbar chalega na khush-iqbalon se
mast hathi hai tiri chashm-e-siyah mast ai yaar
saf-e-mizhgan use ghere hue hai bhalon se
ru-e-khuban se milega hamen bosa ki nahin
haal in shaklon ka kuchh puchhiye rammalon se
aarzi husn se nafrat ye hui hai dil ko
rutba zulfon ko nahin makdiyon ke jalon se
khat-e-shab-gun ne nikal kar abas andher kiya
kafiristan to vo rukh aage hi tha khalon se
do jahan hashr ke din hovenge baham maujud
muttafiq honge idhar vaale udhar valon se
dil hasinon ke tasavvur se banaya khali
aina-khanon men kasrat rahi timsalon se
kuchh to halka karen khar-e-rah sahra-e-junun
bojh langar ka hue hain kaf-e-pa chhalon se
in ke boson ki tamanna hai labon ko ‘atish’
aaina kasb-e-safa karte hain jin galon se
Leave a Reply