yuun chup hai shahr jaise ki kuchh bhi hua na ho
shayad ab is ke ba.ad koi hadisa na ho
kanpa hai barg barg sa jo be-sabab abhi
ye jism andhiyon ka koi rasta na ho
main thak chuka huun dasht-e-masafat ki dhuup men
koi sarab raah mari dekhta na ho
tughyan-e-bevafa.i men Duuba rahun main kaash
mere nasib men tujhe ab dekhna na ho
ubhri hai ḳhushk patton men ik chiḳh duur tak
be-rahm koi paanv unhen raundta na ho
sham-e-taraf jalane se pahle hi dekh lo
ye dasht-e-na-muradi-e-dil ka diya na ho
jo shaḳhs kal mila tha ‘musavvir’ ba-tarz-e-ḳhas
us ki hi shakl ka vo koi dusra na ho
Leave a Reply