chup ke sahra men faqat ek sada kaun huun main
ai ḳhuda tu hi bata mujh ko zara kaun huun main
Dubta huun to ubhar jaata huun lamha-bhar main
kis ke honTon pe huun main harf-e-dua kaun huun main
apni hi zaat ki tashrih nahin kar sakta
rok leti hai mujhe meri ana kaun huun main
vasl ne mere tashaḳhḳhus ko sambhale rakkha
hijr-o-vahshat se kabhi puchh zara kaun huun main
main zamin-zad bhula baiTha huun mansab apna
hai ḳhabar apni na apna hai pata kaun huun main
us ke jaane se ye mahsus hua hai ‘zakir’
hai miri ruuh alag jism juda kaun huun main
Leave a Reply