Tasawwur Pyar Ka Jo Hai Purana Karne Wala Hun

Ayush Charag

tasavvur pyaar ka jo hai purana karne vaala huun

main apni ap-biti ko fasana karne vaala huun

jahan pe sirf vo thi aur main tha aur ḳhushbu thi

usi jhurmaT ko apna ashiyana karne vaala huun

jise main chahta huun vo kahin ki shahzadi hai

so us ke vaste ḳhud ko shahana karne vaala huun

udasi dekh aa.i hai makan shahr-e-mohabbat men

jahan main shaam ko ja kar bayana karne vaala huun

mujhe ma.alum hai vo kya shikayat karne vaali hai

use ma.alum hai main kya bahana karne vaala huun

tiri ankhon tiri zulfon tire honThon se vabasta

ka.i arman hain jin ko siyana karne vaala huun

use jo aql-mandi ki baḌi baten batate hain

unhin logon ko ab apna divana karne vaala huun

‘charagh’ ab kaun si majburiyan hain jo andhera hai

tumhin kahte the ki raushan zamana karne vaala huun