batan aghaz ka dabte hi main ne
raston men ja-ba-ja bikhri hui quvvat
har ik andaz se khud men undeli thi
kitaben aur sakhiyan khvab aur manzar
sahifon ke sunahre harf sab jholi men daale the
khabar thi jis muhim-jui pe nikli huun
yahan chalna musalsal raah daldal aur tavanai mira vahid havala hai
badi muddat hui chalte hue mujh ko
chattanen hain aur un ke baad ik kaala samundar hai
hare uude jaziron se bhara hai
jin pe paanv rakhti jaun to samundar kuchh nahin kahta
ye dekho ek pal hai
takhta takhta girta jaata hai
use girne se pahle paar karna hai
ye takhte to bahana hain
mire paanv hava men hain
ab aage saikdon shakha koi chhitnar hai
jis ki sabhi shakhon se unchi shakh par makkar dushman hai
use ya marna hai ya mujhe bach kar nikalna hai
ye agla marhala hai
ab vo dushman du-badu hai vaar karta hai
main aundhe munh na-jane kin nashebon men ludhakti huun
uchhala khud ko deti huun
to ik balisht se har baar rahti huun
nahin main is muhim-jui se ghabrai nahin huun
fikr bas ye hai
mire raste men ab quvvat nahin hai
bas masafat hai
Leave a Reply