Fauziya Rabab
naqsh takmil tak pahunchta hai
aks bas aap ka ubharta hai
ab mohabbat ki aur had kya ho
meri beti men tu ubharta hai
meri sanson men hai tiri khushbu
meri mehndi men tu hi rachta hai
duur ho kar bhi mujh se duur nahin
meri sanson men tu mahakta hai
ek basti jalai thi us ne
ab ke hakim hai kya vo karta hai
vo jo ilm-o-adab men baune hain
un ka sikka sukhan men chalta hai
dil ki mizrab par ‘rabab’ ab ke
dekhiye saaz kya nikalta hai
Leave a Reply